ഗുസ്തി ഫെഡറേഷന്‍ മുന്‍ പ്രസിഡന്റ് ബ്രിജ് ഭൂഷണ്‍ ശരണ്‍ സിങ്ങിനെതിരായ ഗുസ്തി താരങ്ങളുടെ പ്രതിഷേധം കടുക്കുന്ന സാഹചര്യത്തില്‍ ഈ വിഷയത്തില്‍ തുടര്‍ പരിപാടികള്‍ നിശ്ചയിക്കാന്‍ യോഗം ചേരാനൊരുങ്ങി കര്‍ഷക സംഘടനകള്‍. ഉത്തര്‍പ്രദേശിലെ സോരം ഗ്രാമത്തില്‍ ആണ് മഹാപഞ്ചായത്ത് നടക്കുന്നത്. ഒളിമ്പിക് മെഡലുകളടക്കം ഗംഗയിലൊഴുക്കാന്‍ കഴിഞ്ഞദിവസം താരങ്ങള്‍ തയ്യാറായപ്പോള്‍ കര്‍ഷക സംഘടനകളാണ് ഇടപെട്ട് തടഞ്ഞത്. ഹരിദ്വാറിലെത്തിയ താരങ്ങളെ നരേഷ് ടിക്കായത്ത് അടക്കമുള്ള കര്‍ഷക നേതാക്കള്‍ അനുനയിപ്പിക്കുകയായിരുന്നു. കര്‍ഷക സംഘടകളുടെ ഇടപെടലോടെ സമരത്തിന്റെ ഗതി മാറുമോയെന്നാണ് എല്ലാവരും ഉറ്റുനോക്കുന്നത്.
പ്രശ്‌നപരിഹാരത്തിനായി 5 ദിവസത്തെ സമയമാണ് താരങ്ങളും കര്‍ഷക സംഘടനകളും നല്‍കിയത്. കര്‍ഷക നേതാവ് നരേഷ് ടിക്കായത്ത് ഹരിദ്വാറില്‍ എത്തിയാണ് ഗുസ്തി താരങ്ങളെ കണ്ടത്. കര്‍ഷക നേതാക്കള്‍ താരങ്ങളില്‍ നിന്നും മെഡലുകള്‍ ഏറ്റു വാങ്ങിയതോടെ ഹരിദ്വാറിലെ ധര്‍ണ സ്ഥലത്ത് നിന്നും താരങ്ങള്‍ പിന്‍വാങ്ങുകയായിരുന്നു.
